Datblygiadau Ystadau

Gyda’r angen cynyddol am wybodaeth a sgiliau STEM yn yr economi leol, uchelgais Coleg Gwent yw addysgu gweithlu’r dyfodol mewn adeilad pwrpasol lle bydd myfyrwyr yn cael eu hamgylchynu gan arloesedd a thechnoleg sy’n adlewyrchiad o’r diwydiant. Bydd ein Canolfan Beirianneg Gwerth Uchel (HiVE) newydd yng Nglynebwy yn agor ar hen safle ffatri Monwel yn 2025.

Mewn partneriaeth â Chyngor Bwrdeistref Sirol Blaenau Gwent, Llywodraeth Cymru, y Cymoedd Technoleg, ac addysg, rydym yn buddsoddi mewn Canolfan Beirianneg Uwch yn agos at gampws Parth Dysgu Blaenau Gwent, a fydd yn cynnig addysg peirianneg o ansawdd uchel er mwyn rhoi’r sgiliau angenrheidiol i bobl ifanc ar gyfer y dyfodol.

Mae’r prosiect ar hyn o bryd yn y cyfnod adeiladu, gyda disgwyl i’r gwaith adeiladu gael ei gwblhau mewn pryd i groesawu myfyrwyr, yn cynnwys rhai sydd wedi cofrestru ar gyrsiau peirianneg yn Coleg Gwent o Hydref 2025.

Bydd y cyfleuster addysg carbon-niwtral a chwbl ddigidol, yn hyfforddi gweithlu’r dyfodol mewn disgyblaethau peirianneg uwch megis roboteg, deallusrwydd artiffisial, seiberddiogelwch, gweithgynhyrchu awtonomaidd, efelychiad a realiti estynedig. Bydd y cwricwlwm yn cael ei gynllunio a’i arwain gan arbenigwyr yn y diwydiant. Cyflwynir cyrsiau newydd ar lefelau 3, 4, 5 a 6, gan ddod â rhagoriaeth ac arbenigedd i’r ardal a rhoi hwb i’r economi leol.

Bydd HiVE, drwy ddod â diwydiant ac addysg at ei gilydd i faes peirianneg gwerth uchel, yn cynnig cyfleoedd ymchwil a datblygu i bartneriaid yn y diwydiant. Bydd yn ganolfan ar gyfer rhaglenni allgymorth ysgolion a chyflogwyr, a fydd o fudd i’r gymuned ehangach.

Byddwn ni’n dechrau ar y rhaglen fuddsoddiad fwyaf ers ei sefydliad yn y 1960au. Ein gweledigaeth yw campws Crosskeys sy’n fwy o faint, yn fwy mentrus ac yn well, ac sy’n diwallu anghenion cwricwlwm amrywiol. Mae’r isadeiledd presennol yn cyflwyno problemau sylweddol o ran cynnal a chadw ac mae angen buddsoddiad sylweddol ar rai adeiladau er mwyn moderneiddio’r adeiladau a bodloni ein targedau sero net.

Mae’r gwaith trawsnewid yn dechrau trwy adleoli’r brif dderbynfa i Floc X a fydd yn dechrau’r gwaith o baratoi ar gyfer datblygiad aml-gyfnod. Mae’r cyfnod cyntaf yn cynnwys adeiladu adeiladau newydd gyferbyn â Bloc X ac yna’n dymchwel Bloc B a Bloc F. Ar ôl hynny, bydd Bloc K a Bloc Z yn cael eu disodli a bydd cyfnodau’r dyfodol yn canolbwyntio ar adleoli’r gampfa, gweithdai peirianneg a gweithdai cerbydau modur i flaen y campws.

Mae ein gweledigaeth yn ymestyn y tu hwnt i adnewyddu isadeiledd er mwyn croesawu cynaliadwyedd. Bydd pob adeilad newydd a phob adeilad sydd wedi’i adnewyddu yn sicrhau lefelau uchel o ran effeithlonrwydd ynni neu garbon isel gan alinio â thargedau carbon sero net Llywodraeth Cymru.

Rydym yn gwerthfawrogi mewnbwn gan ein rhanddeiliaid ac rydym yn cynnal proses ymgynghori ag aelodau staff, preswylwyr a phartneriaid allweddol eraill.

Rydym yn cydweithio i greu campws sy’n fodern, yn gynaliadwy ac yn ddeinamig er mwyn i ni allu parhau i gynnig profiad gwych i fyfyrwyr ac aelodau staff am genedlaethau i ddod.

Mae Campws Dinas Casnewydd, sydd wedi’i leoli ar heol Nash, angen buddsoddiad sylweddol er mwyn addysgu gweithlu’r dyfodol i’r safon uchaf a darparu cyfleusterau addysgu a dysgu rhagorol. Mae Cyngor Bwrdeistref Sirol Casnewydd wedi cyhoeddi cynnig adfywio i symud Canolfan Casnewydd i safle canolfan hamdden newydd ar Lan yr Afon, gyda safle presennol Canolfan Casnewydd yn cael ei ddatblygu’n gampws newydd i Goleg Gwent ac yn rhan o Ardal Wybodaeth Casnewydd.

Mae hyn yn rhoi cyfle i ni greu cyfleuster newydd sbon, modern ac addas i’r diben mewn lleoliad sy’n haws i’n dysgwyr a’n staff gyrraedd iddo. Bydd y campws modern gwerth £90m yn symud darpariaeth ystod eang o gyrsiau addysg bellach o Heol Nash, gan ddod â thua 2,000 o fyfyrwyr a staff i ganol y ddinas. Bydd yr amgylchedd dysgu gwell hwn yn agos at gampws Prifysgol De Cymru – darpariaeth addysg uwch bresennol y ddinas – ac yn ffurfio Ardal Wybodaeth Casnewydd.

Bydd y cyfleuster addysg newydd sbon yng nghanol y ddinas yn cynnig cyfleoedd dysgu mwy hygyrch er mwyn gwella canlyniadau addysgol ac adnoddau cymunedol yr ardal ac, ar yr un pryd, yn rhoi hwb i’r economi leol a chynyddu nifer yr ymwelwyr yng nghanol y ddinas.