Llongyfarchiadau i ddosbarth 2024

Molly McAlorum

Y flwyddyn cyn imi fynd i’r coleg roeddwn i’n dioddef o orbryder, felly roeddwn i’n bryderus iawn ynghylch dechrau yn y coleg, ond ar ôl imi gwrdd â’r tîm iechyd meddwl fe dawelwyd fy meddwl yn syth.

Yn ystod y 2 flynedd y bues i’n astudio yno, doeddwn i ddim yn sicr beth yr oedd arna i eisiau ei wneud, ond trwy siarad â thiwtoriaid, mynd i ddyddiau agored a chael ymwelwyr â’r coleg, fe ges i lond gwlad o gyfleoedd na fyddwn i byth wedi’u cael heb Goleg Gwent.

Erbyn hyn mae gen i brentisiaeth busnes gyda GE Aerospace, sy’n gyfle gwirioneddol dda i mi ddechrau fy ngyrfa. Rydw i wedi cael cymaint o gefnogaeth gan fy nhiwtoriaid wrth iddyn nhw fy helpu i i baratoi ar gyfer y broses gyfweld. Roedd gallu defnyddio’r llyfrgell yn y coleg hefyd wedi fy helpu i baratoi, gan fy mod i’n gallu mynd ar y rhyngrwyd ac ymchwilio.

Bella Davison

Fe wnes i astudio cymdeithaseg ar gyfer TGAU a gwirioni’n llwyr ar y pwnc, ac roedd arna i eisiau astudio rhagor arno. Ychydig iawn yr oeddwn i’n ei wybod am seicoleg a throseddeg fel dewisiadau Lefel A ond pan es i ddiwrnod agored ar gampws Crosskeys fe ddangosodd y darlithwyr imi pa mor ddiddorol ydyn nhw a pha mor dda yr oedd y tri phwnc yn gweddu i’w gilydd.

Ar ôl astudio mae arna i eisiau parhau â throseddeg ym Mhrifysgol Abertawe, a dod yn dditectif gyda’r heddlu gobeithio. Fe wnaeth Coleg Gwent fy helpu i sylweddoli gymaint o opsiynau oedd gen i ar gyfer fy nyfodol. Roedd pob darlithydd yn gallu fy nhywys wrth imi benderfynu ar ba yrfa yr oedd arna i eisiau ei dilyn a pha gyrsiau fyddai’r rhai gorau er mwyn mynd â fi i’r cyfeiriad hwnnw. Y tu hwnt i hynny, fe ges i hefyd lawer iawn o gymorth o ran technegau adolygu, sgiliau ysgrifennu traethodau a threfnu, a chefnogaeth emosiynol. Rwy’n awr yn teimlo’n llawer mwy parod ar gyfer y brifysgol, o ran yr agweddau academaidd a’r rhai cymdeithasol.

Kamal Shah

Gan fy mod i wedi gorffen fy nghwrs, rwy’n dechrau yn y Brifysgol ym mis Medi, yn astudio Bioleg ym Mhrifysgol Caerfaddon.

Roedd pob un o fy nhiwtoriaid mor gefnogol. Pan ddechreuais i feddwl am wneud cais i brifysgolion Grŵp Russell, fe wnaeth fy nhiwtoriaid fy annog i wneud hynny, gan gredu yn fy ngallu i gael cynigion ganddynt, hyd yn oed pan oeddwn i’n ansicr am hynny fy hun.

Os oes gennych chi’r amser i wneud y cwrs a’ch bod chi eisiau cyrraedd prifysgol, yna mae’r cwrs yma’n berffaith.

Kasia Tomsa

Ar ôl gorffen fy Safon Uwch, rwy’n gobeithio mynd i’r Brifysgol i astudio Sŵoleg ac yna dechrau gyrfa ym maes cadwraeth bywyd gwyllt. Trwy gydol fy nghyfnod yng Ngholeg Gwent, cefais lawer o gyfleoedd i ennill sgiliau a fyddai’n helpu yn y Brifysgol. Er enghraifft, cefais fy ariannu i gymryd rhan yn rhaglen The Brilliant Club a oedd yn caniatáu i mi brofi dysgu yn null prifysgol gyda myfyriwr PhD ac argymhellwyd Cwrs Preswyl Biowyddorau Caergrawnt i mi lle roeddwn yn gallu cymryd rhan mewn ystod o ddarlithoedd Bioleg i ennill profiad a sgiliau.

Byddwn yn bendant yn argymell Coleg Gwent i unrhyw un sy’n ystyried hynny ar gyfer eu haddysg bellach! Roedd diwylliant fy nghampws yn gefnogol, yn gydweithredol ac yn ysbrydoledig ac yn fy helpu i deimlo’n hyderus yn ystod fy nghyfnod yno ac ar gyfer y dyfodol.

Rhianna Lewis

Ar ôl astudio yn y coleg, rwy’n bwriadu dechrau fy ngradd yn y Gyfraith ym Mhrifysgol Caerdydd. I mi, roedd Coleg Gwent yn allweddol wrth gynnig y cymorth yr oeddwn ei angen er mwyn cyrraedd yno. Fel rhywun oedd yn angerddol am yrfa yn y gyfraith o’r eiliad y dechreuais i yn y coleg, roedd fy athrawon bob amser yn gefnogol ac wrth law os oedd gen i unrhyw gwestiynau am sut y gallwn i symud ymlaen yn yr yrfa hon.

Ni fyddaf byth yn anghofio’r awyrgylch croesawgar y mae Coleg Gwent wedi’i ddarparu drwy gydol fy amser yma. O’r ffeiriau croeso i’r ffeiriau llesiant, roeddwn bob amser yn teimlo fy mod yn cael fy ngweld a fy nghlywed. Dim ots pa broblem oedd gen i, roedd wastad rhywun yna i gynnig datrysiad.

Nid yw Coleg Gwent erioed wedi teimlo fel lle addysg ond yn hytrach yn rhywle lle rwy’n rhydd i feddwl drosof fy hun, ac yn cael fy annog i wneud hynny. Byddwn yn bendant yn argymell mynychu Coleg Gwent

Chloe Simmonds

Ar ôl Coleg rwy’n gobeithio mynd i Brifysgol Caerdydd i astudio gradd Meistr mewn Peirianneg Fecanyddol gyda blwyddyn mewn diwydiant, yna rwy’n gobeithio mynd i faes Fformiwla 1. Mae’r coleg wedi fy helpu gymaint wrth baratoi ar gyfer hyn mewn addysg a sgiliau. Y prif beth mae’r coleg wedi’i roi i mi baratoi ar gyfer fy nyfodol yw hyder. Rwy’n credu bod fy nghyfnod yn y coleg wedi rhoi cymaint o hyder i mi ym mhob agwedd oherwydd yr amgylchedd cefnogol lle cewch eich annog i fynd ar drywydd unrhyw beth rydych yn ei ddymuno.

Byddwn yn annog pawb i ymddiddori a chymryd rhan mewn bywyd coleg. Cymerwch ran bob amser a gwnewch gais am bob cyfle oherwydd gallant agor cymaint o ddrysau a rhoi cymaint o brofiadau i chi. Dwi wedi gallu bod yn rhan o gymaint o bethau anhygoel yn y coleg drwy ymuno mewn gweithgareddau a dwi’n credu ei fod yn gwneud eich profiad coleg gymaint yn fwy gwerthfawr.

Hannah Cushing

Ar ôl fy Lefel 2, rwy’n symud ymlaen i fy Lefel 3. Mae gen i gyfweliad am swydd cynorthwyydd gofalu am anifeiliaid yn ysbyty PDSA yng Nghaerdydd lle bydda i’n parhau i ddatblygu.

Mae bod yn ôl yn y coleg wedi bod yn gymaint o hwb imi. Rwy’n teimlo bod gen i reolaeth ar fy mywyd eto, a’m bod i’n mynd i’r cyfeiriad y mae arna i eisiau mynd iddo.

Treuliwch amser yn datblygu, waeth faint oed ydych chi. Dim ond chi all wneud y penderfyniad i fynd â’ch bywyd i’r cyfeiriad cywir.