Coleg Gwent yn dathlu cyflawniad tiwtor trwy Wobrau Tiwtor Ysbrydoli!

Llongyfarchiadau, Karen

Mae Coleg Gwent yn falch o gyhoeddi bod Karen Riste, tiwtor ymroddedig ac ysbrydoledig, wedi derbyn Gwobrau Tiwtor Ysbrydoli! yn y categori Cymraeg i Oedolion.

Mae Gwobrau Tiwtor Ysbrydoli! blynyddol, a drefnwyd gan y Sefydliad Dysgu a Gwaith, yn cydnabod gwaith gwerthfawr tiwtoriaid a mentoriaid o ran cefnogi dysgu gydol oes ar draws Cymru.

Mae Karen wedi bod yn rhan o gymuned Coleg Gwent ers 1994 ac, yn ystod y cyfnod hwnnw, mae hi wedi arddangos ymrwymiad eithriadol i’w myfyrwyr.

Mae’r tiwtor Cymraeg i Oedolion, a ddysgodd Gymraeg fel oedolyn, yn mynd y tu hwnt i’r disgwyl yn barhaus i sicrhau bod eu dysgwyr yn cyrraedd eu potensial llawn ac yn mynd ar ôl eu nodau.

Cafodd Karen ei henwebu ar gyfer Gwobr Tiwtor Ysbrydoli! o ganlyniad i’w dulliau addysgu arloesol, ei chefnogaeth ddiflino o’u dysgwyr a’u hymroddiad i greu amgylchedd dysgu cadarnhaol.

Crëodd ei gallu i greu adnoddau a deunyddiau newydd argraff da ar y pwyllgor dyfarnu. Roedd hwn yn cynnwys cronfa o adnoddau ychwanegol o’r enw ‘Siaradwch’ i gefnogi cynnwys cwrslyfrau CBAC y cawsant eu haddasu i gyd-fynd â’r cwrslyfrau newydd a gynhyrchwyd gan Y Ganolfan Dysgu Cymraeg Genedlaethol.

Roedd Karen hefyd yn gyfrifol am greu a pheilota 5 cwrs ar-lein dwys (Cwrs Carlam 1 – Cwrs Carlam 5), lle gall dysgwyr ddysgu cyfwerth â thair blynedd o gwrs Cymraeg mewn un flwyddyn. Addasodd gynnwys cwrslyfrau’r cwricwlwm arferol i greu cwricwlwm addas ar gyfer y cyrsiau hyn.

I recriwtio mwy o ddysgwyr ar gyfer y cyrsiau Carlam dros yr haf, hefyd helpodd Karen i greu fideo i hyrwyddo ac esbonio’r cyrsiau.  Hefyd, cynigiodd amrywiaeth o sesiynau rhagflas er mwyn i ddysgwyr gael blas ar gynnwys y cwrs gan helpu i ehangu mynediad a chreu llwybrau newydd i mewn i ddysgu.

Gan fyfyrio ar ei chyflawniad, dywedodd Karen: “Mae derbyn Gwobr Tiwtor Ysbrydoli! yn fraint. Mae fy mhrofiad fy hun fel dysgwr Cymraeg yn fy helpu i ragweld yr heriau y mae fy nysgwyr yn eu hwynebu a gallaf esbonio pethau’n glir oherwydd hynny. Rwy’n falch nad yw fy nysgwyr yn ofn gofyn cwestiynau – mewn gwirionedd, rwy’n eu hannog! Mae gennym ni awyrgylch cyfeillgar a hwyl lle mae pawb yn teimlo’n ddiogel i ofyn cwestiynau ac i roi cynnig ar bethau.”

Dywedodd Nicola Gamlin, Pennaeth Coleg Gwent: “Mae Karen yn ymgorffori rhinweddau addysgwr eithriadol. Mae ei hangerdd am addysgu’r Gymraeg i oedolion a’i hymroddiad i lwyddiant dysgwyr yn ysbrydoledig iawn. Mae’n glir ei bod hi’n berson gofalgar sy’n mynd y tu hwnt i’r disgwyl yn ei rôl ac rydym yn hynod o falch o gael Karen yn aelod o’n tîm.”

Dywedodd Joshua Miles, Cyfarwyddwr Cymru y Sefydliad Dysgu a Gwaith: “Mae cyflwyno Gwobr Tiwtor Ysbrydoli! i Karen Riste yn fraint. Mae ei thaith o ddysgwr Cymraeg i diwtor ysbrydoledig yn dyst i’w hangerdd a’i hymroddiad.

“Mae ei chariad at yr iaith Gymraeg yn heintus, gan ysgogi dysgwyr a chyd-addysgwyr. Mae hi wedi trawsnewid bywydau llawer o ddysgwyr sy’n oedolion gan rannu ei harbenigedd yn hael trwy fentora tiwtoriaid eraill a datblygu adnoddau arloesol gan gynnwys y ‘Cwrs Carlam’. Mae ymrwymiad Karen i greu amgylchedd dysgu cynhwysol a chefnogol yn ei gwneud yn dderbynnydd haeddiannol iawn o’r wobr hon.”

Mae Coleg Gwent yn cynnal amrywiaeth o gyrsiau ar ran Y Ganolfan Dysgu Cymraeg Genedlaethol ym Mlaenau Gwent, Caerffili, Sir Fynwy, Casnewydd a Thorfaen. Mae’r cyrsiau hyn yn rhaglenni sy’n cyfuno astudio yn yr ystafell ddosbarth, astudio ar-lein neu astudio mewn dosbarthiadau nos wythnosol a dysgu dwys.