Dathlu lansiad swyddogol ein Hwb Seiber

Mae ein Hwb Seiber wedi bod ar agor ers peth amser bellach, ac mae’r dysgwyr wedi bod yn elwa ar dechnoleg a chyfarpar seiber o’r radd flaenaf ers dechrau’r flwyddyn. Ond oherwydd COVID, bu’n rhaid gohirio lansiad swyddogol y cyfleuster tan nawr. Felly, yn ddiweddar cynhaliwyd digwyddiad lansio llwyddiannus ar gyfer ein Hwb Seiber newydd anhygoel ym Mharth Dysgu Blaenau Gwent yng Nglynebwy.

Lansiwyd yr Hwb Seiber fel rhan o Cyber College Cymru, sef rhaglen sy’n anelu at eich paratoi ar gyfer gyrfa mewn seiberddiogelwch. Gan fod y galw am unigolion hyfforddedig yn y sector hwn yn cynyddu, a chan fod yna bryderon ynglŷn â bwlch sgiliau lleol yn y dyfodol, mae Cyber College Cymru wedi cydweithio gyda nifer o bartneriaid sefydlu i ddiffinio rhaglen o safon fyd-eang yn ymwneud â sgiliau seiberddiogelwch er mwyn cynorthwyo colegau addysg bellach a myfyrwyr yng Nghymru.

Mae Hwb Seiber uwch-dechnoleg newydd Coleg Gwent yn hollbwysig i’r rhaglen ac mae’n arwain y ffordd o ran addysg seiber yng Nghymru. Mae Fujitsu ac Admiral, dau fusnes a leolir yng Nghymru ac sy’n bartneriaid cyflogi gwerthfawr i Coleg Gwent, wedi bod yn allweddol o ran sefydlu’r hwb trwy gyfrannu’n ariannol at y lle a’r dechnoleg. Mae gan yr hwb ei hun gyfarpar o’r radd flaenaf a’r gallu i weithio oddi ar y rhwydwaith – elfen allweddol er mwyn eich galluogi i ymarfer gweithgareddau seiberddiogelwch a dysgu amdanynt.

Roedd y rhai a fynychodd y digwyddiad yn cynnwys Nick Smith, AS, a Chadeirydd Llywodraethwyr Coleg Gwent, Mark Langshaw, ynghyd â llywodraethwyr eraill ac aelodau staff hollbwysig. Hefyd, roedd cynrychiolwyr o Fujitsu, Admiral, Thales a Dŵr Cymru yno i ddathlu lansiad llwyddiannus y prosiect, a hwythau’n bartneriaid allweddol i’r prosiect ei hun ac i’r coleg yn gyffredinol.

Medd Dan Coles, Cyfarwyddwr Ymgysylltu Allanol yn Coleg Gwent:

“Mae’r economi, yn enwedig y byd digidol, yn symud yn gyflym – gwyddom hynny o’r gorau. Hefyd, mae’r farchnad lafur yn eithriadol o gystadleuol, felly mae pobl ifanc sy’n mentro i’r byd gwaith yn wynebu marchnad lafur gystadleuol iawn.

Un o rolau addysg yw rhoi profiadau addysgu a dysgu i bobl ifanc – profiadau a fydd yn eu paratoi ar gyfer y byd gwaith ac yn cefnogi’r economi ac anghenion cyflogwyr. Mae cael y fenter bwysig hon yma yng Nglynebwy yn gyfle anhygoel, er mwyn helpu i sicrhau’r llif hwn o dalentau i Gymru yn y dyfodol.”

Medd Nick Smith, AS:

“Pleser i mi oedd helpu i ddwyn ymlaen y cynlluniau hyn ar gyfer yr Hwb Seiber hwn. Gwelais yn fuan fod y sector hwn yn tyfu a bod cynifer o gyfleoedd i’w cael. Does dim rhaid ichi fod â gradd a gallwch ddechrau yn y gwaelod ac esgyn fry. Rydw i wrth fy modd fod y cyfleuster newydd anhygoel hwn ar gael i bobl ifanc ar garreg eu drws, a’i fod yn cynnig llwybr at swyddi crefftus â chyflog da.

Beth am ddysgu mwy ynglŷn â Cyber College Cymru a’r cyfleoedd sydd ar gael i weithio yn y maes seiberddiogelwch yn ystod ein diwrnod agored nesaf. Ymgeisiwch nawr i ymuno â ni ym mis Medi a llwyddo yn y byd seiber cyffrous – ond peidiwch ag oedi, mae’r llefydd yn diflannu’n gyflym!